இன்றைய காலத்தில் மேக்-கப் இல்லாத பெண்களை பார்க்கவே முடியாது. அதிலும் என்ன தான் மேக்-கப் செய்தாலும், கண்களுக்கு செய்யும் மேக்-கப் சரியில்லையெனில், அந்த மேக்-கப்பே வீணாகிவிடும். ஏனெனில் மேக்-கப்பில் கண்கள் தான் முக்கிய பங்கு வகிக்கின்றன. எனவே கண்களுக்கு செய்யும் மேக்-கப்பால் கண்கள் நன்கு மென்மையாக அழகாகக் காணப்படுவதற்கு ஒருசில டிப்ஸ்களை அழகியல் நிபுணர்கள் கூறுகின்றனர். மேலும் அந்த டிப்ஸ்களை அடிப்படையாகக் கொண்டு தான், கிரிஸ்டின் ஸ்டீவர்ட் நிறைய முறை மேக்-கப் செய்துள்ளார். அது என்னவென்று படித்து, அவற்றை பின்பற்றி, கண்களை அழகாக வெளிப்படுத்துங்கள்.
* கண்களில் செய்யும் மேக்-கப்பில் மஸ்காரா தான் முக்கியமானது. அதிலும் கண் இமைகளை நன்கு அடர்த்தியாக வெளிப்படுத்துவதற்கு, கருப்பு நிற மஸ்காராவை பயன்படுத்துவது நல்லது. சிங்கிள் கோட் போதாமல் இருந்தால், டபுள் கோட் வேண்டுமானாலும் கொடுக்கலாம்.
* மஸ்காராவை அளவுக்கு அதிகமாகவும் கொடுக்கக்கூடாது. ஏனெனில் அது கலைந்து, அசிங்கமான தோற்றத்தை தரும். எனவே மஸ்காரா அதிகமாகிவிட்டது போல் தெரிந்தால், லாஷ் கர்லர் அல்லது பிரஷ் வைத்து, சீவி அதிகமாக இருக்கும் மஸ்காராவை நீக்கலாம்.
* பின்பு கண்களின் இமைகளுக்கு மேல் இருக்கும் பகுதியை காஜலை வைத்து, அடர்த்தியான கோடு வரைய வேண்டும். அதிலும் அந்த கோடு மூக்கின் பக்கத்திலிருந்து போடும் போது மெல்லியதாகவும், போக போக அடர்த்தியாகவும் இருக்க வேண்டும்.
* கண்களுக்கு போடும் ஐ-லைனர் பென்சிலாக இருப்பது நல்லது. நீர்மமாக இருந்தால், அவை பின்பு கலைந்து அழகை கெடுத்துவிடும்.
* மேலும் கண்களின் கீழ் இமைகளில் போடும் ஐ-லைனர் ப்ரௌன் அல்லது காப்பி நிறத்தில் இருப்பது நல்லது. இதனால் மேல் இமைகளுக்கு மேலே போடப்பட்டுள்ள காஜல் சற்று அழகாக வெளிப்படும். முக்கியமாக அவ்வாறு கீழே போடும் போது, மெல்லியதாக இருப்பது மிகுந்த அழகைத் தரும்.
* பிஸ்கட் அல்லது லைட் கலரில் இருக்கும் ஐ-ஷேடோவை பயன்படுத்துவது நல்லது. இதனால் மேக்-கப்பானது சற்று அழகாக காணப்படும். முக்கியமாக சிவப்பு மற்றும் மெரூனைப் பயன்படுத்துவதை தவிர்க்க வேண்டும்.
* கிரிஸ்டின் ஸ்டீவர்ட் போன்று நல்ல கிளாமரான பார்வையில் இருக்க வேண்டுமென்றால், உதட்டிற்கு சிவப்பு நிற லிப்ஸ்டிக் மற்றும் லிப் கிளாஸ் போட்டால், அது மாலை நேர பார்ட்டிக்கு சிறந்ததாக இருக்கும்.
* பகல் நேர பார்ட்டிக்கு செல்ல வேண்டுமென்றால், மேற்கூறிய கண்களுக்கான மேக்-கப் ஐடியா சிறந்ததாக இருக்கும். ஆனால் லிப்ஸ்டிக் லேசான ப்ரௌன் நிறத்தில் போட்டால், நன்றாக இருக்கும்.
ஆகவே மேலே சொன்ன சில மேக்-கப் டிப்ஸ்களை மனதில் கொண்டு, மேக்-கப் செய்து வந்தால், கவர்ச்சிகரமாக இருக்கும். மேலும் வேறு ஏதாவது மேக்-கப்பின் அடிப்படையானது தெரிந்தால், எங்களுடன் பகிர்ந்து கொள்ளுங்கள்…
