சேலம் மாவட்டம் இடைப்பாடி அருகில் உள்ள சமுத்திரம் தொப்பவளவு கிராமத்தை சேர்ந்தவர் மணிகண்டன். இவரது மனைவி (27) எம்.காம். படித்துள்ளார். இவர்களுக்கு கடந்த வருடம் திருமணம் நடந்தது.
திருமணத்திற்கு முன்பு அப்பெண் மேட்டூருக்கு பேருந்தில் சென்று எம்.காம் படித்து வந்தார். அப்போது அவருக்கும் ஜலகண்டாபுரம் மலையம்பாளையம் காட்டு வளவை சேர்ந்த சதீஸ் குமாருக்கும் (வயது 25) பழக்கம் ஏற்பட்டது. அடிக்கடி இருவரும் செல்போனில் பேசி பழகி வந்தனர்.
இருவரும் நெருங்கி இருந்தபோது சதீஸ்குமார், அப்பெண்ணை செல்போனில் ஆபாசமாக படம் எடுத்து வைத்து கொண்டார்.
இந்த நிலையில் பெண்ணிற்கு திருமணம் ஆகி விட்டது. பின்னர் சதீஸ்குமார் போலீஸ் வேலைக்கு சேர்ந்து விட்டார். தற்போது அவர் கோவையில் உள்ள 4 வது பட்டாலியன் பிரிவில் பணியாற்றி வருகிறார்.
இவர் கடந்த சில நாட்களாக மணிகண்டன் மனைவிக்கு செல்போனில் பேசி மிரட்டி வந்தார். தான் சொல்லும்படி நடக்க வேண்டும். தனது ஆசைக்கு இணங்க வேண்டும். இல்லையென்றால் செல்போனில் உள்ள ஆபாச படங்களை கணவர் மற்றும் உறவினர்களின் செல்போனுக்கு அனுப்பி வைத்து விடுவேன் என மிரட்டி வந்தார்.
இதனால் அதிர்ச்சி அடைந்த பெண், இதுபற்றி அவரது கணவரிடம் தெரிவித்தார். பின்னர் இடைப்பாடி போலீசில் நேற்று புகார் செய்யப்பட்டது.
இந்த புகாரை விசாரித்த இன்ஸ்பெக்டர் சக்கரபாணி போலீஸ்காரர் சதீஸ்குமாரை கைது செய்ய சேலம் மாவட்ட போலீஸ் சூப்பிரெண்டு சக்திவேலிடம் அனுமதி பெற்றார். பின்னர் அவர் கோவை சென்று சதீஸ் குமாரிடம் விசாரித்தார்.
