சாம்பியன்ஸ் லீக் தொடரில் பங்கேற்க இந்தியா செல்லவிருந்த பாகிஸ்தான் உள்ளூர் அணிக்கு அனுமதி கிடைக்கவில்லை.
ஐந்தாவது சாம்பியன்ஸ் லீக் டி20 கிரிக்கெட் தொடர் இந்தியாவில் வரும் செப்டம்பர் 21ம் திகதி தொடங்குகிறது. இதில் இந்தியாவில் இருந்து மும்பை, சென்னை, ராஜஸ்தான் என்று மூன்று அணிகள் பங்கேற்கவுள்ளன.
தவிர, அவுஸ்திரேலியாவின் பெர்த் ஸ்கார்ச்சர்ஸ், பிரிஸ்பேன் ஹீட், மேற்கிந்திய தீவுகளின் டிரினிடாட் அண்டு டுபாகோ உள்ளிட்ட 8 அணிகள் நேரடியாக பங்கேற்கும்.
வரும் செப்டம்பர் 17ம் திகதி முதல் 20ம் திகதி வரை நடக்கவுள்ள தகுதிச் சுற்றின் மூலம் மீதமுள்ள 2 அணிகள் தெரிவு செய்யப்படும்.
இதில் ஐதராபாத் (இந்தியா), ஒடாகோ வோல்ட்ஸ் (நியூசிலாந்து), கண்டுரட்டா மரூன்ஸ் (இலங்கை) மற்றும் பாகிஸ்தானின் பைசலாபாத் வால்வ்ஸ் என்று 4 அணிகள் விளையாட இருந்தன.
ஆனால், சமீபத்தில் எல்லைப் பகுதியில் இந்திய ராணுவத்தினர் கொல்லப்பட்டதால் ஏற்பட்ட பதட்டமான நிலை காரணமாக பாகிஸ்தான் வீரர்கள் இந்தியா வருவதில் சிக்கல் ஏற்பட்டது.
இவர்களுக்கு போதிய பாதுகாப்பு கொடுக்க முடியாது என்று மத்திய அரசு கைவிரித்தது. இதனால், பாகிஸ்தான் வீரர்களுக்கு விசா கிடைக்கவில்லை.
இதனால், தகுதிச் சுற்றில் மூன்று அணிகளை மட்டும் வைத்து விளையாட இந்திய கிரிக்கெட் கட்டுப்பாட்டு வாரியம் (பி.சி.சி.ஐ.,) முடிவு செய்துள்ளதாக தெரிகிறது.
