விஜய்யின் தலைவா ‘வெளியே சொல்ல முடியாத’ சிக்கலில் சிக்கி, ஒரு வழியாக ரிலீஸாகி, அரையும் குறையுமாக வசூலித்த நிலையில், அடுத்த படம் ஜில்லா பற்றியும் ‘கொளுத்திப் போட’ தொடங்கிவிட்டார்கள், கோடம்பாக்கத்தில் சிலர்.
“பொறுத்திருந்து பாருங்கள், ஜில்லாவுக்கு தமிழக அரசின் வரிவிலக்கு கிடைக்காது” என்று அடித்துச் சொல்லும் சிலர், “படத்தின் ஏரியாக்கள் முழுமையாக விற்று முடிவதற்கு முன்னரே வரிவிலக்கு கிடைக்காது என்ற கதை அடிபட தொடங்கி விட்டதால், ஜில்லா பிசினெஸ் பாதிக்கும்” என்று சொல்பவர்களும் உள்ளார்கள்.
தற்போது ஹைதராபாத்தில் உள்ளார்கள் ஜில்லா டீம். படத்தின் இறுதிக்கட்ட படப்பிடிப்பில் பிசியாக உள்ள டைரக்டர் நேசன், முன்ஜாக்கிரதையாக, “ஜில்லா படத்தில் துளியளவுகூட அரசியல் கிடையாது” என்று இப்போதே அறிவித்து விட்டார்.
“இரண்டு ஆண்டுகளுக்கு முன் நான் உருவாக்கி வைத்திருந்த திரைக்கதை இது. அதில் எந்தவொரு சிறிய மாற்றமும் செய்யப்படாமலேயே படமாக்குகிறேன்” என்று அவர் கூறுவதன் அர்த்தம், “லேட்டஸ்ட் அரசியல் பற்றி எதுவுமே வர சான்சே இல்லை” என்பதுதான். ‘தலைவா’ தலைவலிக்குப் பின், ஜில்லாவில் அரசியல் இருந்தால்தான் ஆச்சரியப்பட வேண்டும்.
மதுரையை சுற்றியுள்ள பகுதியில் நடக்கும் கதை என்பதாலே ‘ஜில்லா’ என்ற பெயர் என படத்தின் கன்செப்டை கூறுகிறார் டைரக்டர். அப்படியானால், முதலில் ‘ஜில்லாவுக்கு’ தலைவா ஆகி, மாவட்டத்துக்கு தலைவா ஆகி, மாநிலத்துக்கு…. என்று போகாது கதை.
கிடைத்த தகவல்கள், இது ஒரு போலீஸ் கதை என்பது போல உள்ளன. விஜய் கேரக்டர் போலீஸ் அதிகாரி என்பது மட்டுமல்ல, காஜல் அகர்வால் கேரக்டரும் போலீஸ் அதிகாரிதான் என்கிறார்கள் சிலர். காஜலுக்கு அதிரடி ஆக்ஷன் காட்சிகளும் உள்ளன என்கிறது, மற்றொரு ஊர்ஜிதமாகாத தகவல்.
படத்தின் ஸ்டில்களை பார்த்தால், மோகன்லாலுக்கு வயதான கேரக்டர் என்றே தெரிகிறது. மோகன்லால் எந்த வயது கேரக்டரில் நடித்தாலும், கேரளாவில் படம் ஓடும். ‘ஜில்லா’ மலையாளத்திலும் தயாராகிறது (அங்கேயும் வரிவிலக்கு உண்டா சாரே?)
ஜில்லா படத்தில் இடம்பெறும் காட்சிகளின் ஸ்டில்களை பெரிதாக வெளியே காட்டாமல் ஓரிரெண்டு குளோசப் காட்சிகளை மட்டும் வெளியே விட்டிருக்கிறார்கள். ஆனால், ஷூட்டிங் ஸ்பாட்டில் எடுக்கப்பட்ட சில போட்டோக்கள் உள்ளன. அவற்றை வைத்து கதையை ஊகித்துவிட மாட்டார்களா நம்மாட்கள்?
அந்த ஸ்டில்களில் தேர்ந்தெடுத்து 10 போட்டோக்களை கீழேயுள்ள இணைப்பில் தந்திருக்கிறோம். சுவாரசியமாக உள்ளன, நீங்களும் பார்த்து வையுங்களேன்.
